Vertram mer's nit!

"Di Fuess isch gross und stark di Hand.

Du bisch en Ris und hesch Verstand.

Missbruch das nid im Übermuet!

S'isch jedes Läbe heilig Guet.

S'hät jedes Tierli Herz und Chöpfli und jedes isch e Gottesgschöpfli.

Gang sitz ins Gras und lueg in Rueh dem allerchlinste Läbe zue!

E so-n-e armlang Mattestück isch tuusigfältigs Läbesglück.

Bi jedem Löchli, jeder Ritze cha's ineschliefe, usepfitze;

s'isch unschinbar und chli und zart,

doch's läbt und otmet uf si Art und freut sich dra, dass d'Sunne lacht und d'Erde Tischlideckis macht.

E Raupe turnt en Halm duruf.

Es fliegt es Müggli uf,

und i de grollte Bluemelättli händ chlini Chäfer weichi Bettli.

Si spile Guugus mitenander. Die grosse renne umenander.

D'Ameise uf de Scholle unde händ sich zur Arbet zämegfunde.

Es Schnäggli schlicht sin stille Wäg.

E Spinnli baut en liechte Stäg

Vo Halm zu Halm und rächnet us ob Platz sig für e Summerhuus.

En Rägewurm schafft schwer und lang. Si Wohnig brucht e neue Gang.

Wo d'numme stuunsch mit Ohr und Blick, isch Läbe, Arbet Leid und Glück.

E Welt im chline, zart und schüüch, und doch e gordnet eige Rich.

Gib Sorg derzue! Und hüet di Tritt!

Und wenn du chasch, vertramp mer's nit."

​

​